عەلی زەیدی، سەرۆکوەزیرانی عێراق، ئەمڕۆ سێشەممە پێشوازی لە عەبدولقادر ئوراڵئۆغڵو، وەزیری گواستنەوە و ژێرخانی تورکیا و شاندی یاوەری کرد.
بەپێی ڕاگەیەندراوی نووسینگەی میدیایی سەرۆکوەزیرانی عێراق، لە دیدارەکەدا، زەیدی جەختی لە قووڵی پەیوەندییەکانی نێوان عێراق و تورکیا کردەوە و گرنگیی فراوانکردنی هاوکارییە ئابووری و وەبەرهێنانییەکان لە نێوان هەردوو وڵاتدا خستەڕوو.
زەیدی ئاماژەی بەوە کرد، لە ماوەی سەردانە چاوەڕوانکراوەکەی بۆ تورکیا ژمارەیەک یاداشتنامەی لێکتێگەیشتن لە کەرتە گرنگەکاندا واژوو دەکرێن.
هەروەها لە دیدارەکەدا دوا پێشهاتەکانی پڕۆژەی ڕێگای گەشەپێدان و گرنگیی ئابووری و گەشەپێدانییەکەی بۆ عێراق، تورکیا و ناوچەکە تاوتوێ کرا.
زەیدی ڕێنمایی کرد میکانیزمێکی ڕوون بۆ دابینکردنی بودجە و جێبەجێکردنی پڕۆژەکە دابنرێت، بۆ ئەوەی کارە کردارییەکان بەپێی خشتەی کاتی دیاریکراو دەست پێ بکەن.
لە لای خۆیەوە، عەبدولقادر ئوراڵئۆغڵو، وەزیری گواستنەوەی تورکیا ئامادەیی وڵاتەکەی بۆ جێبەجێکردنی پڕۆژەی ڕێگای گەشەپێدان دەربڕی و ڕایگەیاند، دیدگای هەردوو لایەن لەسەر پێویستیی دەستپێکردن بە دروستکردنی ژێرخانە سەرەکییەکانی پڕۆژەکە یەکسانە.
لێدوانەکان داخراون.