بەپێی هەواڵێکی ماڵپەڕی شەفەق نیوز، سەرچاوەیەکی ئاگادار، ئەمڕۆ سێشەممە، ئاشکرای کردووە کە بانکی ناوەندیی عێراق ڕێنماییەکی نوێی دەرکردووە بۆ کەمکردنەوەی پشکی گەشتیاران لە دراوی بیانی.
بەپێی بڕیارەکە، پێدانی دۆلار بە گەشتیاران لە ٣٠٠٠ دۆلاری ئەمریکییەوە بۆ ٢٠٠٠ دۆلار کەمکرایەوە.
سەرچاوەکە ڕاگەیاندووە کە ئەم بڕیارە هەموو هاووڵاتیانی عێراقی دەگرێتەوە کە لە ڕێگەی فڕۆکەخانەکان و هەموو دەروازە سنوورییەکانەوە گەشت دەکەن، جا بۆ مەبەستی گەشتوگوزار، چارەسەری پزیشکی، خوێندن، ئەنجامدانی فەریزی حەج و عومرە، یان گەشتەکانی کار بێت.
سەرچاوەکە ڕوونی کردووەتەوە کە میکانیزمی پێدانی بڕی پارەکە وەک خۆی دەمێنێتەوە و هیچ گۆڕانکارییەکی تێدا ناکرێت، بەو شێوەیەی کە گەشتیار دەتوانێت لە ڕێگەی بانکی حکومی و تایبەت و کۆمپانیاکانی ئاڵوگۆڕی دراوی مۆڵەتپێدراوەوە پشکەکەی وەربگرێت، دوای مۆرکردنی پاسپۆرتەکەی و پێش کاتی هەڵفڕینی گەشتەکە.
هەروەها سەرچاوەکە ئاماژەی بەوە داوە کە ڕێنماییە نوێیەکان ئەو گەشتیارانەشیان گرتووەتەوە کە بەهۆی بارودۆخی تایبەت، وەک هۆکاری پزیشکی یان بازرگانیی نائاسایی، پێویستیان بە بڕی زیاتر هەیە. بەپێی ڕێنماییەکان، ئەوان دەتوانن پشت بە کارتەکانی پارەدانی ئەلیکترۆنی ببەستن و بڕی زیاتر بۆ کارتەکانیان زیاد بکەن.
سەرچاوەکە جەختی کردەوە کە خەرجکردنی پارە لە دەرەوەی عێراق بە ڕێگەی ئەم کارتانە، بەپێی نرخی فەرمی ئاڵوگۆڕ دەبێت کە بریتییە لە ١٣٢٠ دینار بۆ هەر یەک دۆلاری ئەمریکی.
لێدوانەکان داخراون.